Там, за вёскаю,
белавежынка,
пакручастая
ў пушчу сцежачка,
што ідзе-вядзе
ў тую сторану,
дзе растуць-цвітуць
макі сораму.
Галубовая крылапташачка
і наросхрыст мая рубашачка.
Травы клеяцца медастоямі,
сэрцы ўзвеяцца над прасторамі.
Сонца падае,
сонца коціцца,
промнем цененькім
ледзь залоціцца.
У пушкім лапішчы
пад галінамі
горкне вабішчам
грэх ялінавы.
Я дзядоўнікам
абкасмачаны,
цела радуецца,
сэрца плача.
П’ю сцюдзёную
ды з калодзіча
засумованую
асалодзіцу.