Добры дзень, Масаляны!
Я вярнуўся здалёк.
Па-над хатай цаглянай
ядлаўцовы дымок.
І здаецца,
не ездзіў
я за горы, лясы,
а на выгане недзе
толькі выйшаў з расы.
І знаёмыя людзі,
і вярбы карані
прастрамілі мне грудзі
на рэнтген дабрыні.
Каб ніякае плямкі,
каб ніякіх рубцоў!
Зноў дзяцінства з буслянкай
паганяю дубцом.
І слязу абціраю.
Сёння ля чварака
Гузючыха старая
не налье малака.
Пра жыццё не спытае
маладая вярба.
Вецярком павітае залатая журба.
Добры дзень, Масаляны!
Я вярнуўся дамоў.
Бачу хаты цаглянай ядлаўцовы дымок.