Паважаныя чытачы! Пры Бераставіцкай раённай бібліятэцы дзейнічае праграма “Дыстанцыйная прававая дапамога насельніцтву” для малазабяспечаных грамадзян. Кожны другі аўторак месяца Вы маеце магчымасць атрымаць бясплатную юрыдычную кансультацыю на хвалюючыя Вас пытанні.

12.09.2019г. Дзень адчыненых дзвярэй “Бібліятэка запрашае”

Напярэдадні Дня бібліятэк Беларусі ў Бераставіцкай раённай бібліятэцы імя В.М.Кавалеўскага прайшоў Дзень адчыненых дзвярэй “Бібліятэка запрашае”. Для навучэнцаў 1-га курса Бераставіцкага сельскагаспадарчага ліцэя бібліятэкары правялі экскурсію-запрашэнне ”Вас сардэчна вітае скарбніца мудрасці”, падчас якой дырэктар бібліятэкі Т.Д.Марцішэвіч коратка пазнаёміла дзяцей з гісторыяй стварэння раённай бібліятэкі, паінфармавала іх аб тым, як стаць чытачом бібліятэкі, аб кніжным фондзе бібліятэкі. Для навучэнцаў правялі тэматычны агляд літаратуры, прадстаўленай на выставе “Ёсць храм у кніг – бібліятэка”, прысвечанай Дню бібліятэк Беларусі, а таксама расказалі аб асаблівасцях мастацкага афармлення раённай бібліятэкі.

Далей мерапрыемства прадоўжыў вулічны флэшмоб “Як прайсці ў бібліятэку?”. Менавіта такое пытанне задавалі бібліятэкары жыхарам Вялікай Бераставіцы. Тым, хто не знаёмы з бібліятэкай, уручалі памяткі-запрашэнні з інфармацыяй аб раённай бібліятэцы.

Завяршыўся Дзень адчыненых дзвярэй сустрэчай з удзельнікамі клуба маладых інвалідаў “Вяселка дабра”, якія прыйшлі павіншаваць супрацоўнікаў бібліятэкі з надыходзячым святам – Днём бібліятэк Беларусі. Бібліятэкары падзякавалі гасцей за віншаванні і абмеркавалі з маладымі людзьмі пытанні і падрабязнасці далейшых мерапрыемстваў.