Кніга займае значнае месца ў жыцці кожнага чалавека. Яна прыходзіць у наша жыццё з маленства, з першых яскравых малюнкаў і захапляючых казак, з першых літар, якія пачыналі вывучаць у школе. Чалавек павінен паважаць, шанаваць, берагчы і захоўваць кнігу. У філіяле “Пагранічная сельская бібліятэка” прайшла гадзіна дапамогі “Кніжная бальнічка” (чарговае пасяджэнне дзіцячага аматарскага аб’яднання “Дамавічок”). Дзеці разам з бібліятэкарам з задавальненнем і ахвотай рамантавалі кнігі, якія пашкодзіліся ад шматразовага выкарыстання, падклейвалі кніжныя вокладкі і старонкі. Аказаўшы кнігам “дапамогу”, юныя чытачы засталіся задаволеныя тым, што ўнеслі свой невялічкі ўклад у “гісторыю жыцця” выданняў, якія чыталі ў свой час яшчэ іх бацькі.