Да Міжнароднага дня роднай мовы, які адзначаецца ва ўсім свеце 21 лютага, у
Бераставіцкай раённай бібліятэцы імя В.М.Кавалеўскага прайшло літаратурнае
паведамленне “Да роднай мовы крок зрабі!”. На мерапрыемства запрасілі вучняй
8-га класа Вялікабераставіцкай сярэдняй школы. Бібліятэкар Д. Лагада пазнаёміла
школьнікаў з гісторыяй заснавання знамянальнай міжнароднай даты і з некаторымі
цікавымі фактамі пра мовы розных краін свету.
Дзецям прапанавалі праверыць свой узровень валодання роднай беларускай
мовай. Яны перакладалі словы з рускай на
беларускую мову, падбіралі эпітэты да словазлучэння “беларуская мова”, чыталі
вершы і ўрыўкі з празаічных твораў беларускіх пісьменнікаў. Супрацоўнік
бібліятэкі заклікала вучняў любіць сваю мову, вывучаць яе і шанаваць. Мова –
душа народа, векавая памяць многіх пакаленняў,
наш галоўны нацыянальны скарб. Нашы продкі нямала
зрабілі для таго, каб наша беларуская мова была прызнана роўнай сярод іншых моў
свету. Любіце, ведайце і шануйце мову свайго народа, умейце дасканала валодаць
ёю!
'
