21.05.2022г. Сустрэча ўдзельнікаў клуба “Пошук” з гераіняй нарыса з кнігі М.В.Маскальчука “Не гасне памяць аб вайне” Л.В. Дубовік, жыхаркай Вялікай Бераставіцы.

 Бераставіцкая раённая бібліятэка імя В.М.Кавалеўскага выпусціла кнігу Міхаіла Васільевіча Маскальчука “Не гасне памяць аб вайне”. Гэта ўжо другі зборнік нарысаў аб Вялікай Айчыннай вайне, у якім  аўтар пры напісанні кнігі выкарыстаў успаміны сведкаў ваенных падзей і партызанскай барацьбы супраць нямецка-фашысцкіх захопнікаў. Супрацоўнікі раённай бібліятэкі арганізавалі сустрэчу ўдзельнікаў школьнага патрыятычнага клуба “Пошук”, з якім супрацоўнічае бібліятэка ў рамках грамадзянска-патрыятычнага праекта “З чаго пачынаецца Радзіма?”, з гераіняй аднаго з нарысаў кнігі Людмілай Васільеўнай Дубовік, жыхаркай Вялікай Бераставіцы. Многія жыхары райцэнтра добра ведаюць гэту жанчыну. Шмат гадоў яна працавала выкладчыкам Бераставіцкага прафесійна-тэхнічнага вучылішча-195 (цяпер Бераставіцкі сельскагаспадарчы прафесійны ліцэй). У гады вайны яна ў васьмігадовым узросце дапамагала партызанам збіраць інфармацыю аб размяшчэнні нямецкіх салдат у сваёй вёсцы Слабодка на Магілёўшчыне. Госці, сярод якіх быў і аўтар В.М.Маскальчук, уручылі Людміле Васільеўне экзэмпляр  кнігі, у якую ўвайшлі яе ўспаміны,  і падзякавалі яе за ўклад у прыбліжэнне Вялікай Перамогі. А Людміла Васільеўна расказала дзецям аб тых тяжкасцях і нягодах, якія выпалі на долю нашага народа ў гады нямецкай акупацыі, і аб тым, як у тыя гады выжывалі дзеці вайны.